Libro de Alexandre: Caballo de Troya

Giovanni Domenico Tiepolo: Caballo de Troya

"Cauallo de Troya"
(736-745)
Andauan los die[z] annos en cabo de passar
nin la podien prender nin la podien dexar
ouo quando les quiso el Criador prestar
Ulixes el artero un seso a asmar

Asmo fer un cauallo de muy fuertes maderos
que copiessen so el quinientos caualleros
en somo fer castiello e en medio çelleros
e ençerrar y dentro los meiores braçeros

Asmaua de poner en somo balesteros
que lidiassen la uilla quatro dias senneros
entrarien en comedio de ius' los caualleros
e pegarien el arca de fuera los ferreros

Asmaua en pues esto que's dexassen uençer
desanparar las tiendas e todo el auer
todos por do podiessen foir a grant poder
e de toda la uista de Troya trasponer

Con sabor del encalço derramarien troyanos
por encalçar los uieios se tornarien liuianos
por amor que sangrienten en los griegos las manos
non fincarie en Troya ninguno de los sanos

Solo que los pudiessemos un poco sossacar
encarnar-s'-ien en nos pensarien de robar
cuydarien el cauallo que era castellar
non se catarien del e dar-le-ien uagar

Desque fuessen un poco de Troya apartados
yxirien los del cauallo que serien ençerrados
fallarien los postigos todos desanparados
serien quando's' catassen en la uilla entrados

Tornarien en comedio los que irien fuyendo
ir-se-ian a la çibdat los otros acogiendo
ir-los-ien los de dentro a fuera refiriendo
quando esto uidiessen perdrien óabor & tiento

Quando ouo Ulixes este seso asmado
fablo con don Nestor un ome muy senado
asmaron que serie conseio aguisado
e que Dios le auie este seso mostrado

Metieron en conseio los prinçipes cabdales
uidieron-lo por seso todos los mayorales
dieron todos a Nestor las fees por sennales
los que se retrayessen que fuessen desleales

Libro de Alexandre
(Estudio y edición de Francisco Marcos Marín)
Anónimo